Sjetse van vreuger

oet en dörp in Zuid-Limburg

Wieër es Zitterd

 

Dao waore luuj die waore noats neet
baove Zitterd gewêes.
Of angeren huègstes nao Mestreech
veur 't heiligdômmefeès.

 

Soms woore mansluuj et gejank en
zeuren in hoes zat,
en zoogten vruikes op in Luuk
in kaffees aan de 'bad'.

 

'nen Enkeling verdween veur good.
Dê zaog ste noats meè trùk.
Ze zagten dan hê zoog zich
in Amêrika gelùk.

 

Soms mooste luuj versjiene bie
de rechter in Mestreech.
Neet veur fitsjkes, ruuzing, vechte,
fitse zônger leech,

 

mèr erfenis, belediging of
vrieën in de steeg,
of es mit kirmes ooze baoj
ze zelf gereete kreeg.

 

Altied woor veur den erme rechter
flink drômhêr gedreèdj.
'Gedùldj,' dach dê, 'den haan van Peètres
hêet drie keèr gekreèdj.'

 

'Gêef duudelek entjwoord,' zag erstrang,
'Ich vraog uch wat ger doot..!!'
'Ich kloat zoa bitje,' zag beklaagde,
'bie me vader op et good'.

 

Door naar De Poskôtsj
Inhoudsopgave