De poskôtsj

 

De autobus bestông nog neet.
't ging allemaol te voot.
Of mit de poskôtsj heen en weer
nao Zitterd. Dat ging good.

 

Bie Coumans heelj de poskôtsj stil.
Dao kruusde ze d'aw baan.
Dan dreèdje ze langs Boels en Bor
de Beukeboum opaan.

 

Ei kêndj bie Vêenders op de bôk
bie 't pêerdje mit de blês.
Veer groate koosten achterin en
ès et moos auch zês.

 

Dan zaot ste waal opeigepeesjd,
mer swênjters waor dat werm.
Doe wôs dich ênkel geine raod
mit kneeje, heuj en erm.

 

Et waor gezellig in zoan kôtsj
Gauw hoofde't neet te gaon.
En es soms eine nuèdig moos
dan bleef et kutsjke staon.

 

Dao waor toch neeme langs de wêeg.
Gei minsj in heèl de streek.
De voorman bòven op de kôtsj
deeg sjus of hê neet keek.

 

In Zitterd ging ver nao Trien Zalden
aan den euverwêeg.
Dao drônk ver gùlzig van den doos
e kogelflesjke lêeg.

 

Bie Sjrage aan de mèert woor auch nog
effekes gestop.
Dao woor de bôttram oetgehaold,
die sjodde koffie op.

 

Vùlheùrkes kreeg ver dao of waal
toetsjen en mekrôns.
Weer keken ôs de augen oet
aan doaze mit bônbôns.

 

Weer leepen oeren op dê mèert
wo zoavèul waor te doon.
Van bagke, kuuke, bloome, stôf
tot kroednaegel en sjoon.

 

En teè veur tendjpien, finkelknolle,
kroed veur awwer luuj,
en tobbe, dêekes, kleier, fitse,
auch zoa good wie nuuj.

 

Weer ginge neet dêk nao de stad,
zoa huègstes êns per jaor.
En auch wal ens dertùssjedoor
ès et kemunie waor.

 

Bie Wolf en Herzdahl woor dan e
kestuumke oetgezoog.
Get völlig waal, ômdat et kêndj
dat minstes ei jaor droog.

 

Weer sleipden ôs zoa good es 't ging
de 'brendj' en 'steiwêeg' op,
de doazen aan de hendj en al
de nuuj patsj op de kop.

 

Bie Bagke stapde ver doadmeug
aan et kaffee weer op.
Et pêerdje dat de stal rook
leep de wêeg trùk in galop.

 

Door naar De staoflông
Inhoudsopgave

Sjetse van vreuger

oet en dörp in Zuid-Limburg