Sjetse van vreuger

oet en dörp in Zuid-Limburg

De staoflông

 

Hê wirkd' in Brunsem op de koel.
Et waor e zwaor bestaon.
Hê moos al nao de statie gauw
en oer et veldj door gaon.

 

Dan mit den trèin van Zitterd oet
nao Hêelder, nao de sjach,
Dan kaole hakke, heèl den daag
tot 'n 'koaj' em baovebrach.

 

En saoves trùk weer heèl dê wêeg.
Om neùgen eind'lek ras.
Mèr smörges weer veur daag en douw
door 't veldj mit flinke pas.

 

Hê wirkde zês daag achterein.
Zoan zêstig oer per wêek.
De errem zeèl bleef sunjes toes
in 't huuske aan de bêek.

 

Mèr nao de haomês ging er nao
de moosem mit de sjùp.
Dao troch er êerpel, èerte, hùtjes
moos en slaajekrùp.

 

Roaj wiemere en kroasele,
die stônge langs de kentj;
graffieùtjes, balroas, kookebloome
bleudje langs de rendj.

 

Hê haw nog noats vakantie g'had
Van krank zeen kaom niks van.
Hê sjouwde ummer door en toch
tevreeë waor dê man.

 

Veur zeve kênjer zörgde hê.
Die kaome jaor op jaor.
De staoflông hêet em mitgesleipt
veurdat er vieftig waor.

 

Door naar Nuujaor
Inhoudsopgave