Sjetse van vreuger

oet en dörp in Zuid-Limburg

Waopestilstèndj (1918)

 

November achteèn zag mer dat
de keizer in Eisde stông.
Ze wôljen em vermaorde wie er
sjus den dans ôntsprông.

 

ômdat er van oos keuningshoes
nog get familie waor.
De Belzjen hejjen 'm, òch zoa gêer,
gevild van teèn tot haor.

 

Wie doe de waopestilstendj kaom,
trochte de pruusje trùk...
Heèl daag lang troch et leger
in Mezeik euver de brùk.

 

Ze gooie waopes in de Maas,
ze vroogen êteswaar.
'ne Varrekieker veur get spek,

revolvers veur 'n segaar.

 

Me vader dê te kieke stông
kreeg zoa mèr op de straot
'ne fèinen troewen herdershôndj
van 'ne roaje kruus saldaot.

 

Dao waoren auch veùl laame bie
en mit köp in verbendj.
In aope karre voore krùpp'le
trùk nao eige lendj.

 

Doe dach ver aan dat trotse leger.
Vlammen in de loch...!
Nao veer jaor vechte waor nog euver
wat hie heives troch.

 

* * * * *

Doe roufden luuj de puntjdraod weg
langs heèl de Belzje kentj.
De Belzjen eisden Limburg op.
Ze zagten 't waor hun lendj.

 

Mèr weer Limburgers wôlje neet,
weer hesen 't road wit blaw.-
't Waor bêter, zag et sjoalpamflet,
te hawte wat mer haw...!

 

Door naar Awd en nuuj
Inhoudsopgave