Sjetse van vreuger

oet en dörp in Zuid-Limburg

Awd en nuuj (nao 1918)

 

't Woor nao dên aorlog noats neet meè
wie mer et vreuger zaog.
In Lùttrao woor de mien geboewd
op 'n dikke kaolelaog.

 

De broenkaol haw al eès gezörgd
veur keèring van 't getie.
Inèns koos eed'rein geldj verdene.
Ermood waor veurbie.

 

Doe eindigde den awwen tied
wie ich dat noe zoa zeen.
Zoaveùl wat daonao langzaamaan
oet 't Limburgs dörp verdween.

 

Veùl hoonder, hunj en katte doad
door auto, stomfits, bùs.
De kênjer mooste van de straot.
Oet waor et mit de rùs!

 

De wan verdween van sjuur en dên.
De mêlk geit nao de stad.
En êns per wêek de wesjtien in
woor daagleks de doesj of bad.

 

Et wesjmesjien deit noe de wesj,
d'aw geùt is noe riool.
Aw sjuure woore bungaloos,
wo stinkt noe nog de pool.

 

Et dêesmesjien sjùd boesje graan
wo eès de vlêgel vloog.
De pêerd zeen bienao aafgesjaf,
den traktor truk de ploog.

 

De Maas wurt noe al sportgebied.
Wo 't vêerroejbuètje voor
dao sjeete noe de surfplenk
tùsje wal en keezel door.

 

De kênjer gaon noe mit vacantie
wied nao vrêemde lenj.
Wee moosten helpen êerpel raape
in de groate menj.

 

De kênjer bônjen es gemeèdj woor
boesje mit de beltj.
Vacantie waor doe zeumm'ren op
et steek'lig stoppelveldj.

 

Weer hùbben noe al allemaol
'nen auto veur de deur,
mèr huèrden in dees tachtig jaor
nog noats zoaveùl gezeur.

 

Dao is e sprêekwoord al zoa awd
wie 't water in de Maas:
Wê 't ungelst'oet de kan wilt krig
den dêksel op de naas.

 

Gein kênjer wil ver op vandaag.
Weer hoddelen ôngerein.
Weer hùbbe trouwen aafgesjaf.
Weer kroepe zoa bieëin.

 

Of 't niks is vleeg ver euv'ral hêr,
Nao Bali, Thailand toe.
En Somers vleeg ver Holland oet
gèt zweiten in Salou.

 

Dao is 'nen tendjarts euveral.
Auch dokters zeen volop.
Weer hùbbe radio en TV. 't Kan
zoa te zeen neet op.

 

Wee hùbbe God vergête noe.
Zou hê nog wal bestaon..?
''t Geit good,' zêet mer, 'auch zônger Heum.
Laot zoa mèr wieër gaon.'

 

Mèr es strak weer den eèlendj kump
den aorlog, hôngersnoad..,
es strak weer bômme valle en ver
bêdele veur get broad.

 

Es strak oos kêndj op sterve lik
of ermood wurt oos lot.
Es strak veur ôs gein oetkôms is
dan bêej ver weer tot God.

 

Door naar Et maedje van vreuger (vervolg)
Inhoudsopgave