Verkeèr en meule

 

Doe voore sjeep nog door de Maas,
ès swêntjers 't water wees.
Doe reej de baronès nog oet
mit palfreneer en sjees.

 

De hônsjkar brach et broad nog vees
al vreug van deur tot deur.
De bagke koupman koos te mèrken
aan gekweek en geur.

 

De kukebènder reej auch dêk
mit kar en pêerd veurbie.
En auch de kar mit tônne beer
vees van de broewerie.

 

Heèl zèlje zaog st'ne masjesjeer
of 't pêerd van 'ne saldaot.
Mèr karre kroate, êerpel, hùj,
die zaog ste dêk op straot.

 

Wat flink rook waor de kar mit mês
es die et dörp door troch.
En ès de boer aan 't tônne waor
dan ruukde 't daag lang nog.

 

'nen Heèlen, heèlen ênkele keèr,
laot zegken êns perjaor,
kaom knallend enen auto langs,
wo veùl koper aan waor.

 

De keu, de hunj, de kar mit pêerd,
ze vloge nao de geùt.
De hoonder vloge wildj doorein
gesjrôkke van de teùt.

 

Weer, kênjer, leepe drachteraan
zoa hel es et mèr ging.
Weer zooken ôs de lônge vol
mit damp dê drachter hing.

 

Auch fitse zaog ste noe en dan,
de hunj kaod drachteraan.
De sjùrskar van de kanteneer
mit rêek en sjôffel draan.

 

Ich hùb de kookar nog gekènd.
Ze kraakde, vol of lêeg.
Ze rammelde, ze sjokkelde
heèl langzaam langs de wêeg.

 

Petrol kaom tweè keèr in de wêek
mit Fèr de dörper rôndj,
'n kar mit tuiten en en bel,
derveur 'ne groaten hôndj.

 

Auch troch wal ens 'ne geitebôk
e kerke mit zek graan,
ôm te maale nao de meule en mit
mêel weer daovandaan.

 

De meulenêer zaot opgeslòte
Meistal heèl allein.
Te langer lêste woor er gek
van 't sjoere van de stein,

 

et slaon van weeke langs de moer,
et kraake van et raad,
altied die zek aan en lang touw
optrêkke door et gaat.

 

En op 'ne mörge vônje z'em,
de touw ôm zene kop.
Hê heeng, door 't gaat ômleèg gesrônge,
ônger 't luukske op.

 

Door naar Spoake, heksen en duuvele
Inhoudsopgave

Sjetse van vreuger

oet en dörp in Zuid-Limburg