Sjetse van vreuger

oet en dörp in Zuid-Limburg

Tweè lènkse sjoon

 

'n Gebeùrtenis waor altied es
de widman vrieë ging.
Dan volgden alle luuj in 't dörp
mit zörg de vordering.

 

Mer zaog em sunjes nao de mês
in 't dônker sunjes pak
de kempe of den diek aaf gaon,
de slips ôm zene nak.

 

De bolhood op. De kêtting ôm.
De snôr in 't vêt gekrùld.
De sjoon gewiksd, gesjaore en
de knip mit geldj gevùld.

 

Ich weit nog dat 'nen heives kaom
mit 'n flinke pùl oet Ech.
Die leep zoa hèl ze loupe koos
den drieden daag al weg.

 

'ne Widman en en widvrouw saame
koos veùl bêter gaon.
Ze hawwen allebei zich nuèdig
veur e good bestaon.

 

Mèr waor aan 't grawwele en 't sjèlje
neet veùl meè te doon,
dan woor gezag: ''t Zeen lênkse klômpe',
of 'tweè lênkse sjoon'.

 

 

 

 

 

 

 

 

 

 

 

 

 

 

 

Door naar Saoterdes
Inhoudsopgave