Toneèl en krènskes

 

Ens in zoaveùl jaore kaom e
klein teater aan.
'n Zeildook tent mit twintjig benk
en baovenop en vaan.

 

'ch Herinner mich nog 'Genoveva',
'n heèl treurig verhaol,
wo mer ens fèin bie griene koos.
Ze greenen allemaol.

 

De beule stôngen naeven et blok.
De keuning op den troan
droog, deep euver zen naas gezak,
en veùl te groate kroan.

 

Hê haw flink ruuzing mit zen vrouw,
en heèl leef keuningin.
Ze waor veur ôntroew aangeklaagd
door en gemein vrindin.

 

Ze woor roew veur 't blok gesleurd.
Ze heeve de bielen op.
Ze wachden tot et twellef sloog,
dan veel den erme kop.

 

'Zal ik haar doden?' vroog de beul.
'O, koning, sta mij bij'
reep Genoveef. De keuning zag:
'Ja beulen, dood haar vrij!'

 

't Waor of et blood al spatte ging.
'n Afsjuwelek moment.
Mèr sjus op tied kaom redding aan
en beùkde de ganse tent.

 

Wie doe 't gezelsjap wieër tròch,
ging oos Lewieke mit.
Et sleipe mit de peùl en tente
brach 'ne speler spit.

 

De jông ging blie de wêreld in,
van Ech tot Kêvelêer.
En wieër nog tot aan de Rien,
dao troch ter mit hun hêr.

 

Dat hèj er doe neet môtte doon.
Et brach em gei gelùk.
Den ermen duuvel greeg g'ne cent.
Gei jaor doe waor er trùk.

 

Hê kalde noats euver zen reis.
Et zaot em gaar neet good.
En neet veùl later woor er krank.
Dao waor get mit ze blood.

 

Wie 'r stôrf kreeg er e krenske op
van roazeroad en wit.
Dat ging bie de begrafenis
auch in de doadskês mit.

 

Allein bie vriegezèl en kêndj.
(en ôngesjreve wêt).
Zoa krenske pasde eimoal neet
bie luuj oet 't echt'lek bêd.

 

Mèr waal nog bie de vriegezèl,
auch mit 'ne kale kop.
Al waor er zèstig, zatte z'em toch
e maagd'lek krenske op.

 

Door naar De aw kirk
Inhoudsopgave

Sjetse van vreuger

oet en dörp in Zuid-Limburg