Sjetse van vreuger

oet en dörp in Zuid-Limburg

Tèndjpien

 

Veur tenjebeust'l en tenjezeip
waor gei geldj in de tesj.
Mit zawt en vinger woor gesjoerd
of mit segarenèsj.

 

Van d'awwer luuj haw neeme tenj.
Ze weikden zich et broad.
Allein get stùkker op en rie,
'ne kirkef zwart wie load.

 

Die slechte tenj waoren auch zwart
van d'eèw'ge toebaksproem.
Bie aw luuj klêefde môndj en piep
van broene vieze sjoem.

 

'nen Echten tendjarts waor der neet.
Mit zeem'le woor gepap.
De kranke kèntj of heèl de kop
in dikke wolle lap.

 

In Tuddere zag de 'zahnezieher':
'wouf vrit aan heur tènj.
Noe zeen z'aan 't rotten euveral,
dat zeen ich aan de renj.'

 

Dan zat er voors zen tange drop
En reet wat los zaot droet.
De res zwoor langzaam zelf wal weg
oet d'ingevalle snoet.

 

Dao waor en aw vrouw in de buurt,
die nôm de tendjpien aaf.
Ze zêengerde, sjus wie pestoar,
zichzèlf heèl good veuraaf.

 

Dan moos te kneeën en krees t'auch
e kruus op kop en wang.
Jasses Marint'la Dèus! waors t'es
kêndj veur die vrouw bang.

 

Ze duudje heùre vieze vinger
bênne langs den tenj.
En dan de kop in heùre sjoat
mit saamgevawwe henj.

 

Ich kan uch zêgge dat et dao
neet al te lekker rook.
Wat waor mer blie es mer daonao
weer frisje loch in zook.

 

Tweè knabbe lag ste veur't consult
op taofel in de bak.
En eèrlek...! Vief cent waor neet veùl...
de tèndjpien waor gezak.

 

Door naar De Spaanse griep
Inhoudsopgave