Litsje

 

Den Hitsbèrg waor et speelterrein.
Dao ging ver ummer hêr.
Et sjoanste waor et litsje dao,
veural bie rêenger wêer.

 

Et graas, de grôndj waor dan good naat.
Es 't need gerêengerd haw,
dan plasde ver e gleufde naat.
Mit veùl man ging dat gaw.

 

Den eine bats zats t'op den vêes,
vlak baove dene klômp.
Den angre voot dê stooks te vroet.
Doe stuurdes mit de rômp.

 

Zoa litsjde ver de berreg aaf,
de keuninge te riek.
E paar keèr en doe has en gleuf,
en rôtsjbaan euver sliek,

 

't Waor nuèdig waal dat mer die geùt
good natig hawte moos.
Mèr altied waor wal eine dao
dê nog get plasse koos.

 

En weè de klêverige klei
van achter aan den brook.
Dat kaom van 't sjoere door de geùt.
'ne Naate, vêtte kook.

 

Es t'heives kaoms dao wagde dich
de mooder mit en watsj.
Dan zags te das te aan de bêek
gerôtsjt waors in de pratsj.

 

Ich dênk zoa dêk nog aan wat noe
de kênjer misse toch.
Mèr ja..! Op sjoon geit litsje neet
en wê druèg klômpe nog.

 

En toch waore die klômpe fèin
veur swêntjers in de kaw.
Weer rolden vuur drin oet de stoof
tot in 't hout en brendjloch haw.

 

Dan has te drek al werrem veut.
Ze haww'n auch ôngemak.
Bie d'awwe waor 't de losse reem,
bie nuuje sjerpen hak.

 

De spitse puntjes hakden dich
'haarênkel' aan de voot.
Dat goof de kênjer wêkelang
'n pienleke koosj blood.

 

Aw klômpe leete reeme los;
en klômpe vleege wied.
Dao loupe nòg krôm naaze rôndj
door klômpen oet dên tied.

 

Door naar Oecumene
Inhoudsopgave