Oecumene

 

Veur ôs waor d'oecumene get
wat vanzelfsprêkend waor.
Dao waore ters auch protestant.
En juds zeen gei bezwaor.

 

Op sjoal zaot bie mich in de bank
'ne gooie juddejông,
dê good de katekismes koos
en in et koar mit zông.

 

Es eemes van die judde stôrf
vônj eederein et erg.
Weer trochten in den doajestoet
mit nao de juddeberg.

 

Hun vader sleep en heèl lank mets
es 'kousje' geslach woor,
en sneej mit eine forsen haol
de halsslaagaojers door.

 

Zoa slagd' hê kawver, keu en sjeùp
volges de judse wêt.
Mèr verke neet. Me mooder zag:
'Judde zeen bang veur vêt.'

 

De Pruusjen hùbbe z'opgepakt.
Et waor hun ôngelùk.
Ze zeen verhungerd en vergast,
'nen ênkeling kaom trùk.

 

De juddeberg is noe herstêld
de stein laoge doorein.
Begreudj mit ônkroed laog er dao
verlaoten en allein.

 

'nen Heèl gezeene minsj bie ôs
waor auch den daomineè,
dê mit de meister drùpkes drônk
Et waore vrunj die tweè.

 

Noe houwen Iere, Libanezen,
zich de köp kepot.
Ich snap dat neet. Sjus wie bie ôs
gluive z'in dezelfde God.

 

Door naar Et kesteèl
Inhoudsopgave

Sjetse van vreuger

oet en dörp in Zuid-Limburg