Sjetse van vreuger

oet en dörp in Zuid-Limburg

Literatuur

 

Petrol dê zörgde auch dêk veur
'ne walm van zwarten damp,
in 't keukske es 't petrolsvuur stônk
of lêzend aan de lamp.

 

Mer loos Nick Carter, Buffalo Bill,
de Limburger Koerier.
De graaf van Monte Christo,
Adriaan en Olivier.

 

Op zaoterdig brach Willemke
de 'Illustratie' rôndj.
Die gooj er door de aope deur
nao bênne op de grôndj.

 

'ch Herinner mich dê langen aorlog
nog vanoet dên tied.
Geteikend woor vanoet de loupgraaf
ônger zwaore stried.

 

Want foto's veur de Illustratie
waor nog zeldjzaamheid.
Weer looze woord veur woord 't verslaag
van dreuve wirk'lekheid.

 

'Enkhuiyzer Almanak', dê êns per
jaor woor rôndjgebrach,
veurspèlde 't wêer, goof alle raod
dê mer zich nuèdig dach.

 

Hê waor wat mer noe neume zou
'bestseller' in de streek.
Gei minsj dê neet van tied tot tied
in den Enkhuizer keek.

 

Van Zola waor eìn eksemplaar.
Dat ging van hendj tot hendj.
Pestoar zen maag die loos et oet
en stook et doe in brendj.

 

Door naar De juffrouw
Inhoudsopgave