De 'alte Mutter'

 

Et lêeve van 'ne gooie boer
waor niks wêerd zônger vrouw.
Hê haw heùr nuèdig veur et lendj,
de keu en 't hoesgesjouw.

 

Hê waor toch auch neet meè zoa jônk,
al euver vieftig jaor.
Dao kaom auch nog ens einen tied
dat er verslete waor.

 

Teèn gùlje haw 'r in Wêhr betaald
bie 'n heks mit glaas en kaart...
'Gedùljig wachte, want ze kump',
dat zag em die aw taart.

 

Nao tweè jaor haw zich nog geinein
bie 'm aan de deur gemeldj.
Et kosde aan de sjaol allein
heèl get beloftes geldj.

 

Sjus haw 'r de bêste koo verkoch,
ein of tweè daag teveur,
doe dreèdje d'alte mutter zich
al bie em door de deur.

 

De kòp sjod de zigeunerin.
Ze keek em 'traurig' aan.
'Du armer man, so ohne frau,
das ist doch nichts getan'.

 

Ze loerd'aandachtig nao zen hendj,
keek nao de lien en zag:
'Ich seh ein hübsches weib dao drin,
das häwt ich nit verwach.'

 

Ze neèdje ene buul mit sneur
veur tweè maondj ôm z'ne nak.
Dao haw ze eès de breefkes
van et keuke in gepak.

 

't Verloor zen krach ès 't aope ging.
Es 'r dào aan dênke zou,
dan haw er 'sicher um die zeit
seine geliebte frau.'

 

Nao tweè maondj öpend'hê nerveus
et buulke in de ploaj.
Dao zaot allein kezêtpapier
Ze haw'm verneùkt, die toaj.

 

De masjejeers brachten heùr trùk,
gezêten op en plank,
van achter op en kar gelag
bie wieze van en bank.

 

Ze stook de tông oet, sjôj en vlookde
smêrig, meè dan bar.
Ze spiedje razend nao de luuj,
ze plasde in de kar.

 

Hê zaog wie er te beùke zaot,
d'annôns in de kezêt.
En heèl gooi vrouw zoog dito man,
auch vieftig gei belêt.

 

Ze hêet em altied g'ekstimeerd.
Et geldj waor good belag.
Ze heelje koop're broelef wie ze
nog 'geer' têengen em zag.

 

Ich weit nog dat de buul mit sneur
aan hunne kapstok hing.
Ze waoren euver zevetig
wie hê ten hemel ging.

 

Door naar Menjele
Inhoudsopgave