Sjetse van vreuger

oet en dörp in Zuid-Limburg

Culinair

 

'Einen êerpel heit in 't mundje.
Einen in de speer.
En einen in de groate kômp
al vas in et vizeer.'
        (êerpelêters).

 

Zoa ging dat bie veùl luuj ôm beurten
heèl de taofel rôndj.
'ne Groate bak mit zwarte koffie
ging van môndj tot môndj.

 

Mit middig heeng in eeder straot
de loch van unne saws.
Bie êerpel, stokvêsj... lekker, auch bie
hoon of knien of gaws.

 

Heèl smaakelek waor rogkebroad
mit dikke braoje spek.
En broad flink deep in vêt gesop,
get veur de lekkerbek.

 

Of 'slemp' van beer en mêlk gekaok,
wat toch zoa lekker rook.
En wêt geer waal wie fèin dê waor,
dê bökkempannekook.

 

November heeng de kuusj geslach
op 'n leiër veur de sjuur.
De sjênke kaomen aan 't plefôn
te druège bòven et vuur.

 

En in de tôn de zieë spek.
De kipkap en et blood
krap broen gebakken op de stoof.
Zoan smouer smaakde good!

 

Van 't verke ging altied e stùk
nao heèr pestoar en maag.
Die waoren doe zoa slank zuch neet
wie mer ze zuut vandaag.

 

Door naar Leene
Inhoudsopgave