Sjetse van vreuger

oet en dörp in Zuid-Limburg

Kirmes en missie

 

Mit kirmes woor heèl sjoan geseerd
mit bleuj en eèrebaog.
Percessie troch euver de straot
wo luusj en zendj op laog.

 

Veurop de maagde, wit geklêdj,
daonao de sjùtterie,
en dan de maedjes, dan de jônges,
dan de hermenie.

 

En Sjang dê sjoot de kamers aaf,
sjus of et aorlog waor,
es de percessie stil heelj veur
de zêenger aan 't eltjaor.

 

De mansluuj booge dan devoot
de kop veur Sleveneer.
En saoves zaog se z'in de geùt,
strôndjzaat van al et beer.

 

* * *

Mit Missie daalde euver 't dörp
de ingetogenheid.
Waor eederein weer braaf en vas
tot bêtersjap bereid.

 

Dan stông e kreùmde veur de kirk.
'ne Jud mit sjabeleers,
en roazekrens, medaaljes, beuk,
kêesen en kandeleers.

 

De pater prêekde zoa dat luuj
verginge van den angs.
Mit duuvel, hêl en vagevuur
goof dê ze dervan langs.

 

En toch .. wat koos den dörpeling
doe veur zwaor zunj al doon? ..
Soms woor 'm ônech vadersjap
gesjaoven in zen sjoon.

 

En boere bleve mit de ploog
neet altied op et hunt.
Of woor 'nen ermen duuvel doe
en sjoan vrouw neet gegund.

 

Mèr hê sjreèfde de kansel aaf:
Mer waor verwênd en vrech.
Weer speelden euver, dansden, stoole,
looge, waore slech.

 

De lêsten daag dreèdje hê bie.
Gein voes meè in de loch.
Weer hawwen ôs noe weer bekeèrd.
Weer waore gooi luuj tòch.

 

Nao aafloup brook de jud weer op.
Den hemel kwaom in zich.
De zunj, op penitentie nao,
vergêven in de bich.

 

Door naar Huwelek
Inhoudsopgave