Sjetse van vreuger

oet en dörp in Zuid-Limburg

Den dokter (ôm 1900)

 

Den dokter kaom rôndj mit de sjees.
Hê goof eìn medecien.
Altied anies mit kreozoot
en dan daonaeve wien.

 

Mèr wien dê drônk allein pestoar,
en dê haw gein flesj veil.
't Waor bêter dat er zêenger goof.
In wien zaog dê gein heil.

 

'nen Angere kaom euver de Maas
mit e buètje wat dao laog.
Dê heelj et pisglaas têengen 't leech.
God wêt wat 'r dao in zaog.

 

Ei mit kônjak sjreef dê mèr veur.
Wie kranker, meè konjak.
Dat drônk zich lich, dat waor gezôndj
en pien waor gaw gezak.

 

De meisten hôllepe zichzèlf
mit senne veur den derm,
kemil veur kêel, veur naas en lông,
en snaps heelj 't lichaam werm.

 

Dik zeemle pap veur 't òpe bein
of op de dikke wang.
En dao 'ne wollen dook ômhêr,
geslaote mit en spang.

 

Veùl hêlge waoren auch beklêdj

mit wônjerleke mach,
dor eèwenhêr hun door de kirk
of door luuj toebedach.

 

De beet van raozetige hunj
beteikende den doad.
Mer Sint Hubertus hôlp ôs mit
gezêengerd rogkebroad.

 

Den heilige Blasius woor gebêedj
veur pien in môndj en kêel,
es auch den dikke lap neet hôlp
mit pap van bookesmêel.

 

Es pap en speule veur de tèndjpien
gein verlichting brach,
dan woor aan smeekgebed tot
Apollonia gedach.

 

Dan has te nog Sint Job. In 't Belsj
Sint Job in 't goor.
Dê gêer veur zwêer en zevenuiger
aangeroope woor.

 

De hêlge Geùrtruu waor speciaal veur
ratten en de muus.
Doe hôlpen heèl get hêlgen ôs
veur plaoge wie ste zuus.

 

Doe has auch luuj die bêedjen dich
veur weinig geldj weer good.
Ze nômmen dich de tendjpien aaf
of stöllepden et blood.

 

Ze hôlpen 't slech beslaage pêerd
en 't opgejaagde rêndj.
Die mach kaom van heèl vreuger hêr.
Ze ging awwer op kêndj.

 

Dao achter in de hei, de wêeg op
Gùttecaoven aan,
dao stông e zwart gegaote kruus,
neet wiedaaf van d'aw baan.

 

Dao trochten midden in de nach soms
luuj al bêejend hêr,
ôm veur 'ne kranke hulp te vraoge.
Dêk door wêndj en wêer.

 

En es er nog neet bêter woor
dan mer nao Heppenêer.
Of mit de lang percessie mit
bêejwêeg nao Kêevelêer.

 

Soms heeng e breefke op de deur
'Roodvonk' of 'Dyphterie'
Dan maogde neeme bênnegaon.
Tb waor toegankgvrie.

 

Bie têering dreef et smêtsel volop
door de kwispedoor.
Ze hoosden de bakteriën

de ganse kamer door.

 

Dat woor neet es besmêt gezeen
Gei breefk'op deur of roet.
Dao stôrven doe de meisten aan.
Dao maogde st'in en oet.

 

Altied woor ùrges wal gerieërd
van kaw kaors of wèrm.
Wan têering hoesde hoes veur hoes
in lôngen en in dèrm.

 

En anger krêngde waor de 'klatsj'.
Dê kreeg ste ônverwach,
es te bezwêt van 't danse waors
en heives kaoms bie nach.

 

En es te dan kawd water drônks
dan woors te sterveskrank.
Dan hôlp dich auch de zêenger neet
of dokter zienen drank.

 

't Woor heèl get bêter wie
'nen dokter kaom in Beeg,
dê mit e meuterk'op den draeger
hoesvisites deeg.

 

Hê haw de nuutsjte instremênte
in zen pilletesj.
Hê duldje gaar gne winjel meè.
Den derm moos van de flesj.

 

Mer zaog gein dikke moele meè
of lappen ôm de köp,
of dikke proppe watten in
en oar dat altied löp.

 

De wiezvrouw veulde zich gerùs.
Ze haw get achter zich.
Aan dê minsj zeen ver allemaol
veùl dankbaarheid verplich.

 

Door naar Aloysius
Inhoudsopgave