Zoerdeisem en de moolj

 

Es èns per wêek woor deig geknêedj
woor mêel in 'n moolj gesjod.
Daobie kaom oet de kèlder dan
de zoeren deisemklod.

 

De minsj weesj zich nog eès de veut.
Dat deeg er voot veur voot
in e watertöpke op de vloer,
neet altied êve good.

 

Bie 't mêel kaom dan flink zawt nog en
law water oet de moar.
Hê trooj dan zoalang in de pratsj
tot dê good stevig waor.

 

Den deig woor mit et êerplemèts
van voot en teèn gesjrapt.
Dat woor mit resten aan de bein
en moolj bieëin gedabd.

 

Mit zawt gedêkt ging dat de kelder
weer in op en plank.
Nao 'n wêek ging et de moolj weer in.
Zoa ging dat jaore lank.

 

Den deig woor in rônj klöd geknêedj
en op en plank gelag.
Nao rieze woore z'allemaol
den aoven in gebrach.

 

Dê waor teveuren opgesteùkt
mit sjanse, gleujend heit.
Dat doon ze noe veùl gawwer mit
get elektrisjiteit.

 

Mèr 't is auch lang zoa lekker neet.
Wat waor et vreuger feès ...!
Zoan lekker sneej vers rogkebroad
mit sjroap en fluitekeès.

 

En neet allein de boereluuj,
auch pêerd vroten et gêer.
En es de luuj en steinpuis hawwe
lagte ze't op de zwêer.

 

Door naar Wieër es Zitterd
Inhoudsopgave