De mêstem

 

De mêstem waor destructieplaats.
Dê laog vlak veur de deur.
Dao stông smùrges de nachpot op
te druège veur de geur

 

Bederf en ôngerechtigheid
verdween ônger et mês.
En pasgebaore hunj of katte,
dêk e stùk of zês.

 

Die wooren eès verzaope in de
pool in ene zak.
Mèr auch doaj hoonder, muus en ratte
gingen in de prak.

 

't Gebeùrde dat et vrûgske veùl
te vreug waor en te min.
Dan ging wal ens de ganse miskraom
mit de mêstem in.

 

Dao woor alles in korten tied
tot heèl good mês vertêerd.
In dên tied waor veur alle luuj
den aafval nog veùl wêerd.

 

Nao wörm en maaje dabden dao
de hoonder en den haan.
Zoawie mer zag kaom van díe hoonder
't bêste ei vandaan.

 

De mêstem dreef dêk in de pool,
de bêerpùt oet de stal.
Dê sjuumde zwart en dôndergreun,
mit vleegen euveral.

 

'Es 't water zakt, dan kraakt et ies',
wie in aw sprêekweurd steit.
Es eemes ônger 't plasse door
'ne wêndj de brook in geit.

 

Mér 'es de pool zakt, ruukt de mêstem',
hêt dat in oos taal.
En dat is auch toepasselek
op mennig voel sjandaal.

 

De luif leep sjus nog tùsje mêstem
en de veurdeur door.
Get wieër laog de vèrkesstal
mit bek veur verkesvoor.

 

De koostal wieërop kaom auch nog
op de mêstem oet.
En oetzich waor neet al te sjoan
van 't hoes oet door de roet.

 

Mèr mês beteikende heèl gèt
veur 't burke in dên tied.
Want zônger mês kaom mèr e bitje
kaoren in de miet.

 

En zônger mês greudjen gein dikke
êerpel aan de struuk.
En dàt veulden de verke en de
luuj zèlf in de buuk.

 

 

Door naar Limburgs en Frans
Inhoudsopgave