Aloysius

 

Eeder kloaster haw 'ne broor
dê kruujer ôngerzooch;
zich euver finkel, vingerhood en
anger ônkroed boog.

 

Et book van Aloysius kaom doe
euveral van pas.
Elk hoes haw wie 'ne biebel
Aloysius in de kas.

 

Veur sôkkerziekte, têring, loup,
veur ziektes van et blood,
veur alle krêngdes waor et book
van Aloysius good.

 

Wat dê minsj aan patiente kreeg
haw neemes oats gedach.
Van wied en zied woor krank en krômp
nao 't kloaster toegebrach.

 

Mit kôtsj of boerekar en pêerd
woor et verveur verzörgd.
Soms woore erge kranke zelfs
den heèle wêeg gesjùrgd.

 

Ich lêes hie dat er heèl gêer goof
Oos Leeve Vrouw bêdstruè.
In 't kùsse deeg 't dich lekker slaope;
't hôlp auch tènge vluè.

 

Veur gordelroas hôlp fluitekeès, dik
op de kranke plek.
En auch veur roaj ôntstaoke auge
wor dê keès neet gek.

 

Waat auch good waor veur kranke auge:
trêkken aan en oar!
Of indrùpp'le mit zawt gelösjt
in water oet de moar.

 

Mit boter êerpel misje têenge
koosjten op de kop.
Veur loupauge betonieblaajer
in de naas geprop.

 

Hê drùppelde 't klêev'rig saap
van pêersbloom in et aug.
De wortel van de pêersbloom hôlp bie
slechte neeren auch.

 

Ich gluif toch dat geer bêter doot en
nao den dokter gaot;
en de genêzing neet allein
aan ônkroed euverlaot.

 

Door naar Tèndjpien
Inhoudsopgave